“Militar en aragonés. Una anviesta de l’aragonés en a militancia d’a Cucha independentista” articlo d’Ibai Bona

21 January, 2015

Charrar en una luenga pa charrar d’a propia luenga. Fer servir l’aragonés pa charrar de metalingüistica ye un d’os muitos problemas que ista antiga luenga padeixe en zaguerías, pues fa sensación de que iste país s’endreza a amarguinar-la enta iste afer y belatros poquetz, como pueden estar os lemas politicos (en bellas organizacions tasament d’ambito lingüistico) u ta temas agropecuarios y tradicionals. Sindembargo, ixa tendencia a deixar a luenga amagadeta en ixos cantonetz no ha de cegar-nos y de cabo ta quan sí cal fer una uellada enta ditos cantons idiomaticos. Fer-nos cargo de que o calaixo d’a metalingüistica nos ensenya muitas cosas y si se i mira fito a fito podemos analisar quals son os problemas d’una luenga tant minorizada y más que más meter-les solucions.

En iste sentiu, esforigando en a comunidat aragonesofona, no’n fa guaire, se dioron furos debatz en os retes socials tocant a refusar a lei de luengas u por trigar un sistema grafico u unatro. Bella persona forana que hese seguiu ditas pleitinas podió pensar alavez que l’aragonés tien buena cosa de vitalidat, pos muitas nos calentamos y emplegamos a nuestra luenga pa contrimostrar ixo, que ye nuestra, y que as decisions arredol d’ella hemos de prener-las nusatras mesmas y no pas l’otri. Pero pasan os diyas, os debatz se refredan y con ells, l’aragonés.

Iste ye un problema cheneral en o País, pero propio tamién de nusatras. O sobrebaixo emplego d’a luenga en a militancia d’a Cucha independentista truca o ficacio a propias y allenas. Una luenga que estió d’emplego cutiano mesmo en as más altas cadieras d’o reino y que encara hue, bellas quantas zaguers casas d’a Montanya, resisten comunicando-se entre parentalla y vecindalla con ella, u por convencimiento cultural u porque simplament, siempre ye estau asinas. Lo que ye lo mesmo, l’aragonés ye una luenga que estió, ye y será una ferramienta de comunicación tant valida u más como qualsiquier atra. Manimenos cal saber qué ye lo que le pasa a iste idioma, u a os nuestros colectivos, pa que no se pueda emplegar a luenga que en barallas lingüisticas, ye dicir, blincar a cleta de lo metalingüistico.

L’analís ha de pasar por as condicions d’a propia luenga y prou que sí, d’a nuestra comunidat, a Cucha independentista.
Os problemas de l’aragones son prou conoixius por todas nusatras. Son istos mesmos os que nos fan dispertar d’o «letargo castellanofono», ixe argüello proteccionista nos fan blincar a purna, encara que sia mientres poquetz ratos, de charrar en aragonés.
Se tracta d’una luenga que, fueras de casos excepcionals, no ye materna. Nos hemos d’haber visto todas y cadaguna de nusatras, as neofablants, a craba roya pa aprender-la agarrando-nos exclusivament a la graniza faina d’as asociacions culturals. Os materials publicaus d’autoaduya son radius, asinas que a formación autodidacta esdevién imposible u cal adedicar-le una cantidat d’horas, pa trobar y contrastar informacions, que muitas no nos podemos permitir.

Por atro canto, tenemos a invisbilizacion institucional. As aragonesas no tenemos dreito a aprender l’aragones d’una traza publica y prou que no mientres a formación escolar. Isto y l’opacidat d’os medios de comunicación respective a o tema, fan creyar en l’imachinario colectivo aragonés que no ye una luenga propia de todas, que no fa honra pa vivir-ie de cutio u, en o pior d’os casos, que nian existe. Un solo programa, por eixemplo, en a televisión publica aragonesa, podría tener a capacidat normalizadera que esboldregase de camín ista ripa de topicos. Mirar de crebar istos topicos en a chent sin ditas aduyas institucionals, ye atra d’as razons que fa que nos crememos y reblemos de charrar-la.

As barallas internas son, encara que en menor mida, un trepuz a l’hora de creyar ambients aragonesofonos. «Sotz quatro gatas y sotz tricolotiadas entre vusatras, asinas no s’abanza». Encara que as pleitinas metalingüisticas sian una realidat, no habría d’estar una escusa pa salir-se-ne, pos ye enfrontinando posicions como se plega en os consensos (si totz tenemos una actitut ubierta).
Sí se troba un problema más important en os feitos que dimanan d’a, asperemos que circunstancial, ausencia total de consenso actual. Más que más a l’hora d’atrayer nuevas fablants. Tener a saber-los sistemas graficos u un estándar d’o que as patrimonials se’n riden les fa espanto a las novels en a luenga.

En zaguer puesto, y como feito diferencial d’atra mena de collas humanas, a Cucha independentista ye una comunidat ubierta. Aspira a incrementar a suya militancia a travies d’un ideyario concreto, bien estructurau argumentalment, capable de fer viyer problemas en o País que atras organizacions politicas ignoran de tot, d’atrayer-ie a qualsiquier persona razonable. Pareixe que un emplego cutiano d’a luenga aragonesa podría dificultar arribar o nuestro programa en chent nueva. O castellano ye una luenga que conoixe a totalidat d’as aragonesas y por ello s’imposa tanto en o programamen como en os debatz internos d’a militancia.
Pero nusatras somos Purna, a chovenalla revolucionaria y independentista. L’anima d’a nuestra organización nos define o camín que hemos de debuixar, somos por definición chovens y revolucionarias. Como tals hemos de luitar terne que terne por lo que creyemos, pos ni nos faltan fuerzas ni tenemos guaire a perder. Somos a primer linia de frent d’a Cucha independentista, somos nusatras as que hemos d’ir un trango por debant d’a resta d’a militancia.

Militamos con l’obchectivo chirar o sistema d’una forma radical porque luitamos contra chigants de fierro. Os nuestros obchectivos son muit leixanos d’o sistema blindau en o que vivimos. Ista traza d’actuar como referent, ha d’estar asinas en todas y cadaguna d’as chicotas (pero grans) luitas a las que nos enfrontinamos, tamién a lingüistica. Por ello tenemos l’obligación d’empachar que l’aragonés s’amorte. Hemos de treballar a lomo calient en iste afer, por a nuestra condición y porque no ye a fusta pa fer cullaras, l’aragones ye a luenga romance más chicota d’o mundo y la siguient luenga europeya en amortar-se. Tenemos a responsabilidat de preservar a riqueza lingüistica d’o País como vanguardia nacional que somos. Si no lo femos nusatras, qui lo ferá?. Creyar roldes de charradors d’aragonés en l’ambito d’a cucha independentista ye lo minimo que podemos fer. A pregunta ye cómo fer-lo.
A clau la tenemos alzada en a nuestra propia pocha, en que hemos d’aproveitar que somos una comunidat humana muit especial.

En primer puesto, un gran numer de militants ha pasau, antes u más tarde, por bell curso d’aragonés y buena cosa d’ells tien a capacidat de comunicar-se con ell. Toda ista chent formada ye qui ha d’empuixar o proceso de normalización. Se tracta d’una triga personal, renunciar, tot lo que as circumstancias nos lo permitan, ni más ni menos, que a la nuestra luenga materna, o castellano. Prou que no ye fácil y de garra traza hemos de sentir-nos obligadas a ella, porque como ya s’ha dito ye una decisión personal, pero a realidat ye que l’aragonés ye en as tres pedretas y cadaguna ha d’actuar seguntes lo que le demande l’esmo. Ye un proceso de dominó, as que más saben se van exprisando en a luenga con cierta habilidat y normalidat contrimostrando o potencial social que ella tien. As que saben bell poquet menos, controlan pero no la charran, se’n contachian y s’animan a charrar-ie de cabo ta quan sentindo-se cada vez más seguras y fendo-la servir china-chana más a sobén. As que son empecipiando en o tema d’a luenga van fendo-ie orella y os que no’n saben gota pueden alufrar lo pincha que ye a luenga y talmet se dispierte en ells un sentimiento de querer aprender-la. As que’n tienen mas habilidat han de saber que dezaga d’ells bi ha chent que l’aganaría muito fer-la servir pero no sabe con qui, u tien vergüenya y amenistan familiarizar-se mas con a luenga, u no son guaire conoixedoras d’aragonés pero pendendo d’a situación se rancan a charrutiar-la. Pa todas ellas tener referents aragonesofonos arredol ye fundamental.

A o filo d’istas zaguers, ixas que no’n saben encara pon, no habría de fer-nos miedo que en fer-les sentir l’aragónes se puedan trobar difuera de puesto. Hemos d’estar conscients de que a nuestra luenga ye a saber-la de cercana, antiparti d’a chirmana catalana, tamien d’a hechemonica d’o País, o castellano. Todas tres luengas forman un continuum cheolectal. A suya intelichibilidat ye firme elevada, tanto ye asinas que son cutianos os fenomenos d’hibridación entre ellas. U sía que, a una persona con unas minimas capacidatz y con o castellano como luenga materna, no habría de suposar-le garra problema entender a luenga aragonesa si ha recibiu uns conocimientos minimos u quasi sin d’ells.
Nos trobamos pues, en a chent que no haiga feito cursos, dos factors prou importants que todas aquellas que conoixcamos l’aragonés prou como pa ubrir nuevos vinclos lingüisticos habrianos de fer-ie cuenta. O primer feito ye que a militancia d’a Cucha independentista y a chent que se i acerca, por un regular, tien un intrés por aquello aragonés y ye de buen trobar que por ello tienga nocions minimas d’a luenga. Isto va a ormino enreligau a un prochecto d’amillorar-las a curto-meyo plazo. Pero encara que no sía asinas, por eixemplo con a chent muit choven que encara no ha puesto informar-se-ne, hemos de fer-nos cargo de que qualsiquier no tien as inquietutz menisters pa acercar-se a os nuestros ambients, ye chent que no se mira enta la nuestra opción politica porque s’estile u por aburrimiento. Se tracta de una masa de chent con una base cultural notable u a lo menos con unas capacidatz intelectuals que l’han permitiu dispertar d’un sistema que aduerme a la clase treballadera aragonesa pa fer d’ella una ciudadanalla manipoliable. Todas dos factors, practicament inherents a la nuestra chent, nos facilitan a saber-lo lo camín.

Por atro costau, todas, sía qual sía o nuestro status lingüistico, hemos de mirar d’amillorar perén l’aragonés de cadaguna, tanto a libel personal como organizativo. Como colectivo hemos de meter facilidatz a la nuestra chent pa que pueda disposar d’una formación contina pa amillorar como comunidat lingüística. Isto se puet menar empentando sobrebuenas iniciativas que ya levan bien de tiempo dende que se encetoron. Por un canto no deixar d’ufrir os cursos d’aragonés en UNIZAR y, antiparti, fer publicidat d’os que ufran as escuelas d’aragonés. D’atra man, fer caminar as parellas en aragonés d’o B.I.C. que como ya sabemos tant buenos resultaus han dau en atros países vecins con as suyas respectivas luengas. En zaguer puesto en o tocant a la formación, a militancia que cargue dezaga quantos cursos no habría d’acoflar-se. Tristament l’aragonés que s’ha levau ensenyando mientres anyos, de propio u no, ye bien aluenyau d’a realidat lingüistica que viven os patrimonials, verdaders conoixedors, ells, de lo que ye a luenga. Por ello a chent formada habría d’acercar-se ta l’aragonés patrimonial a pur de leyer autors nativos, importa igual de que variedat. Asinas podremos estar criticos con lo que charramos por un regular y lo que viyemos que se charra en o nuestro redol. Hemos de tractar d’amillorar o nuestro aragonés depurando vicios agarraus mientres a formación de cadaguna.

Pa ir trancando, a comunicación escrita, rai, ye lo de menos. A estratechia que se ye emplegando sobre isto en casa nuestra, pa una situación como la que i ye l’aragonés, ye correcta. Aconseguimos dar-le visualización pero ufrimos quasi totz os nuestros contenius en castellano. Isto nomás podría cambiar-se si aconseguimos o suco de l’asumpto, fer de l’aragones una luenga normal, cutiana en a comunicación oral d’a militancia. Iste feito sería, por naturaleza, o que nos demandaría fer un trango más en a comunicación escrita. Por agora no hemos de fer viyer más de lo que somos: una comunidat castellanofona que tien intrés en fer viyer que l’aragonés existe. Pero mientres explicamos a la resta d’o País que existe, internament hemos d’ir fendo-lo propio de cadaguna de nusatras.
Iste ye o tresoro que garra gubierno nunca no podría sacar-nos. «Sinyors que lechislan: nusatras tenemos una luenga con la que podemos debatir, soniar, cantar, querer. Vivimos en aragonés sin que vusatros podatz remeyar-lo». Ista ye a utopía que tenemos en as nuestras propias mans, nomás cal que nos la creigamos.
Asinas pues, as condicions pa creyar ambients aragonesofonos son dadas. Nomás hemos de sacar-nos as vergüenyas unas, y belatras os prechudicios y creyer-nos que isto ye posible. Concienciar-nos de que endrezar-nos ta las nuestras companyeras en aragonés no mete trepuces a l’abance d’a nuestra militancia si no que ye propiament un acto de militancia. Luitar d’a forma mas eficaz pa fer-lo pervivir, charrando-lo. Entabant companyeras!

Articlo de Ibai Bona ta SOCIALISMO ARAGONÉS 

Comments are closed.

Purna Aragón